👈 қаріп өлшемі 👉

  Өлеңдер ✍️

  29.07.2021
  55


Автор: Сырбай Мәуленов

Ауылдағы кинода

Ол кезде кино жаңалық,
Ауылдың кәрі-жасына.
Шығып ап біздер қарадық,
Ағаштың ұшар басына.
Жұмыс жоқ онда... бұтақтар,
Тартқылай берсін жейдені.
Ашылды дана кітаптар —
Ауылда Ленин сөйледі.
Алақандай пердеге
Кетті бір сыйып кең өлке.
Ораған оқтар кеудеде
Қара да құра көлеңке.
Бұл майдан болар ақырғы,
Сілтейтін семсер суырып.
Түстері суық қатулы
Түюлі зілдей жұдырық.
Өтті Торғай арқылы,
Революция бар күні.
Көк толқынның гүрсілі,
Найзағайдың жарқылы.
Өтті Торғай арқылы
Көк темірлі кекті Отан.
Қаптаған сел қарқыны
Қара түтін, өрт топан.
Түнді түріп қалғыған,
Жанды қызыл таңғы оттар
Лениннің алдынан
Өтіп жатты солдаттар.
Ақ алмастар жарқылдап,
Үзеңгілер сартылдап,
Бара жатты батырлар
Жауды қуып алқымдап.
Ескі дүние жасарып,
Туды жаңа таң жазы.
Тұрды көзге жас алып,
Аманкелді сарбазы.
Жұмыс жоқ онда... бұтақтар
Тартқылай берсін жейдені.
Ашылды дана кітаптар —
Ауылда Ленин сөйледі.


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы