Өлеңдер ✍️

Миллиардтық бірге ағып ағынымен,
Миллиардың шомылып жауынымен.
Жаңғырады кең дала, жаңғырады,
Миллиардтың нық басқан адымымен.
Дабыл қағып Кремль сағатымен,
Миллиардтың жарқырап жаңа атымен.
Қазақстан — мекені миллиардтың,
Ракетаның самғайды қанатымен.
Жұлдыздардың жаралған жарқылынан,
Күзгі ауада жүзеді шалқып ұран.
Миллиардпенен жыл сайын жүлдені алып
Қазақстан танбайды қарқынынан.
Миллиард жолы болған жоқ тегіс мүлде,
Жетті ерлер бусанып жеңіс күнге.
Толқиды алтын миллиард мұхиттарда,
Толқиды алтын миллиард жер үстінде.
Көтеріліп қолдардай дән сабағы,
Шат күлкідей шарықтап таң самалы:
«Қазақстан, миллиард, миллиард»,— деп,
Мұз балақтай саңқылдап жар салады.
Қара-суық, қар-боран қиын шақта,
Берік болып шықты ел биік антқа.
Қыран дала дүниені дүбірлетіп,
Миллиардтан самғайды миллиардқа!
* * *
Бақытым ба, сорым ба?
Ұшырастың сен келіп.
Басты тіктім жолыңа,
Көштім сеңдей сенделіп.
Алдың ұрлап күлкімді,
Бұздың түнде ұйқымды.
Түсімде де арбадың
Желдей желпіп сиқырлы.
Кететіндей жарылып,
Артық-артық сөйлесем,
Торсаңдамай тарылып,
Кешіре сал, кейде сен.
* * *
Тереңге де сүңгімей,
Биікке де шыға алмай,
Қыстан қалған сүңгідей,
Күзден қалған тұмандай.
Мұхитты жүрміз терең деп,
Тереңді көрмей ұйып тек.
Өзіміз жүріп төменде
Ойлаймыз көкті биік деп.