Өлеңдер ✍️

  28.07.2021
  132


Автор: Сырбай Мәуленов

Аспандар

Терезені қаққаны жас тамшылар
Үйге енуге асыққан аспан шығар...
Жолдас аспан! Бұлтыңмен жоғары шық,
Серік іздеп түн ұйқың қашқан шығар.
Біздің үйде мың аспан жатыр шөгіп,
Сен соларға боларсың жақын серік,
Әр аспанның мұнартып өз биігі,
Әр жұлдызы жатады ақынша өліп.
Төбесінде тұратын жарқырап ай,
Аспаны бар Пушкиннің жарқын арай.
Иықтасқан сонымен бір аспан бар,
Салып кеткен арттағы халқына Абай.
Бұлт көздерін қан басып талауратқан,
Некрасов аспаны анау жатқан.
Аспаны бар тәкаппар Лермонтовтың
Найзағайдан тұманда алау жаққан.
Осылардай үйімде мың аспан бар.
Солар менің кеудемнен жырды ашқандар.
Жолдас аспан, сен де кел,жоғары шық,
Аспан, аспан өзіммен сырлас жандар




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу