Өлеңдер ✍️

Бүкіл қазақ өлеңі
Алматыдан аттанып.
Ашхабадқа жөнелді,
Ақ көңілін ақтарып.
Аппақ гүлді баулары,
Ақ мақталы күміс жер.
Жатты теңіз, таулары
Жайып салды туыс ел.
Алға тосты бар сыйын,
Болдық тәнті бауырға.
Ағайынның ән-күйін
Ала қайттық ауылға.
Көңілдерге түсірдік
Көркін көркем жерінің.
Айтуға аздап қысылдық
Айыбын құм-шөлінің.
Теңізін де, тауын да
Араладық бірқатар.
Жанды тербеп тағы да
Түсті өлең боп бұл сапар.