👈 қаріп өлшемі 👉

  Өлеңдер ✍️

  26.07.2021
  92


Автор: Сырбай Мәуленов

Пионер лагерінде

Көркі болып Аққұмның
Жаңа егілген бақ жатыр.
Қанатындай аққудың
Ортасында ақ шатыр.
Ілулі тұр қақпада,
Жазғы лагерь жалауы.
Күн ұяға батқанда
Жалтылдайды алауы.
Сол оттармен бір шалқып,
Ұшады әндер қанатты.
Бұлақ біткен күй тартып,
Жаңғыртады алапты.
Сол бір оттың жанында
Күтер едім таңды ұзақ,
Жібермейді баруға
Сақал-мұртым жалғыз-ақ.
* * *
Келді көктем күндері,
Кетті қыстың ызғары.
Толқиды тау гүлдері
Табиғаттың қыздары.
Жібек шашын жел тарап,
Аялайды күн нұры.
Ән шырқайды гүлге арнап
Таудың ерке бұлбұлы.
Қайнап бұлты құздардың
Суарады кейде оны.
Қызыл-жасыл қыздардың
Құлпырады көйлегі.
Қашан көрсең әмәнда
Қызыл гүлдер мәңгі жас.
Сондай жастық саған да
Тілер едім қарындас.


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы