Өлеңдер ✍️

  26.07.2021
  124


Автор: Сырбай Мәуленов

Арша

(Қайнекейге)
Тосын бойы толы арша,
Тосын бойы қалың ну.
Құздарынан таласа
Құйылады ағын су.
Түк демейді, ол саған
Тоғайынан ал арша.
Шық тауына қоршаған,
Іш бұлағын қанғанша.
Бәрі тегін, ол жомарт
Тілегі бар бір ғана.
Жолаушыдан қолқалап,
Сұрайды тек жыр ғана.
1956
* * *
Аралап алыс бұлттарды,
Жағалап жалпақ даланы.
Таудан төмен сырғанап,
Күн зымырап ағады.
Күн зымырап ағады,
Ұясына қонады.
Бұлт үстінде толқиды,
Күннің қызыл жолағы.
Құз, қияны өрмелеп,
Ай туады дөңгелек.
Сырғанайды дөңгелеп
Көреді өзін көлге кеп.
Бұлдырап барып батады,
Артынша таң атады.
Бұлт үстінде толқиды,
Күннің қызыл шапағы.
Құлпырады шығыс жақ,
Күн тұрады ту ұстап.
1956




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу