Өлеңдер ✍️

Украина майданда
Маған да жігер, күш құйдың,
Көрдім ізін далаңда
Богдан Хмельницкийдің.
Дүбірлеген екпінмен
Тұрды Тарас үні кеп.
Днепрден өттім мен
Көп солдаттың бірі боп.
Қара торқа жеріңді
Жата қалып сүйіп мен,
Іздеп сенің кегіңді
Аттанғанмын Киевтен.
Қызыл тудың астында
Жүрді өзі Щорстың.
Аманкелді басты алға
Қасында ұлы орыстың.
Шақырып елі шаттыққа
Бейбітшілік, бірлікке.
Соңғы снаряд аттық та
Соғысқа қойдық бір нүкте.
Днепрдің жарында
Белгісіндей майданның.
Тұр Тарастың жанында
Ескерткіші Гайдардың.
Қанымыз бір бауырлас
Украина қойныңды аш,
Хуторларың ауылдас,
Құшағымыз айрылмас.
1953
* * *
Бұлтты үйіріп,
Жаңбыр құйып,
Жер гүлдеген, көк шығып.
Жел желпіген,
Желкілдеген
Көшелерде көк шыбық.
Жан-жағына
Сұлу көктем
Суреті тұр түсіп.
Әрбір үйдің
Шарбағында
Көгершіндер жүр ұшып.
Бақытты елдің
Аспанында
Бақытты күн жүзеді.
Шырқап таудың
Асқарына
Қуаныш — жел кезеді.
Кейде көкте
Көкшіл-жасыл
Лента ойнайды тізіліп.
Менің қызым
Қол созады
Ленталарға қызығып.
1953
* * *
Жақын қалды барар жерің
Тұр аяулым, тұр ажарлым.
Таң алдында алакеуім
Таулары тұр Мұғаджардың.
Әрине, сен ойламадың,
Мұғаджарды жас шағыңда,
Өйткені сен ойнамадың,
Оның биік асқарында.
Бері келе дүниенің
Қарадың сен картасына.
Асыға бір ой жібердің
Сыры жұмбақ тау-тасына.
Талай қыс, жаз, күзді өткеріп,
Ешбір затқа елеңдемей.
Таулар тұрды тізбектеліп,
Шумақ-шумақ өлеңдердей.
Тұрды таулар тас түйіле,
Қымтап,
бүркеп құпиясын.
Білем ертең тасқа үңіле
Ойға шомып отырасың.
Поезд келіп жетті енді,
Тұр аяулым, тұр ажарлым!
Сені күтіп көптен бері
Таулары тұр Мұғаджардың.
1953