Өлеңдер ✍️

Сенде тұңғыш қуанып,
Сенде тұңғыш жыладым.
Қала көрме суалып,
Қайран, Қайнарбұлағым!

Сенде тұңғыш биіктеп,
Шарықтады жыр-әнім!
Ұлыңды елге сүйікті ет,
Қайран, Қайнарбұлағым!

Жалғандықтан бездім де,
Шындық болды тұрағым.
Қадіріңді сездім бе,
Қайран, Қайнарбұлағым?

Өзің берген төзіммен,
Сан сындарға шыдадым.
Ата-анамның көзіндей,
Қайран, Қайнарбұлағым!

Мендегі адал сөзімдей,
Көк балауса құрағың.
Кәусарлықтың өзіндей,
Қайран, Қайнарбұлағым.

Аярлықтан аулақпын,
Шындық — шұғыла шырағым.
Көкейден жыр саулаттың,
Қайран, Қайнарбұлағым!

Сенде тұңғыш марқайып,
Қатар ұшты сыңарым.
Қала көрме ортайып,
Қайран, Қайнарбұлағым!