Өлеңдер ✍️

  01.07.2021
  157


Автор: Фариза Оңғарсынова

Балықшы қыздың әні

Асыр сап өстім ерке көк теңізде,
Жап - жас қыз – балықшы! – деп, сөкпеңіз де!
Алыссақ асау толқын құшағында,
ерігіп жүргеміз жоқ текке біз де.
Долы жел гулесе оттай лапыл қағып,
бұлқынар асау толқын қатуланып.
Бәрі де елең емес балықшыға,
өйткені ол сескенбейтін батыр халық.
Өйткені толқында өстім жас шағымнан,
өзімді сезіп сонда асқақ ұлан.
Өйткені перзентімін табиғаттың,
жан сырын көк теңіздің жастан ұғам.
Тотықса ақша бетім – шыныққаным,
жігітім, шошып қалма, сынып сағың.
Немене көмірдей деп, қабақ түйме,
жас жаным – нәзік, ерке қылықтарым.
Сырына асау теңіз болсаң құмар,
біз кеттік, қалып қойма, барсаң, жүр, ал!
Каспийдің, кеш өкінбе әлі талай,
қызы да, балығы да тамсандырар!

1958




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу