Өлеңдер ✍️

  28.06.2021
  294


Автор: Әселхан Қалыбекова

АЛПЫСТЫ АЙТҚЫМ КЕЛМЕЙДІ

Асу да асу бел дейді
Аса бір соққан жел дейді.
Не барын алда кім білген,
Нығыздап тарттым белбеуді.

Жаз дәурен өтті ,жөн дейді
Жайланып қызық көр дейді
Жабыла сыйлап тұрса да,
Жас қауым саған ермейді.

Көбейте берсең гөй-гөйді
Кейінгі ел дұрыс көрмейді .
Қашқақтап кетсең кел дейді,
Шайыңды солар демдейді.

Ажалсыз пенде өлмейді,
Жақсыға жүрім кем дейді.
Мұқағали мұхит жетпеген,
Алпысты айтқым келмейді.

Нар қобыз сыңсып желдейді.
Жалғанның соңы шөл дейді.
Көпбайдай көк жал аспаған,
Асуды айтқым келмейді.

Байғыздың жағы сембейді,
Бірі …кем дүние, сен дейді .
Иманға ынтық жүректі ,
Иллалла ғана емдейді.

Сахидың оты сөнбейді,
Сахарда жанды тербейді.
Сабырдың түбі сары алтын,
Сынаса Тәңір мендейді.




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу