Өлеңдер ✍️

  31.05.2021
  142


Автор: Қадыр Мырза Әли

Революция семсері

Революция бұлбұлдары сайраған
«Марсельеза»— менің пірім,
Байрақ ән.
Қиындықтың шар қайрағы от шашқан
Феликсті алдаспандай қайраған.
Жалын жұтқан,
Алау кешкен замандас,
Ескерткіштің тұр алдында жалаң бас.
Сөзі де өткір,
Өзі де өткір Феликс
Болатұғын барып тұрған ақ алмас.
Аман болса ар-ожданның бесігі,
Ұмытылмас ұлы перзент есімі.
Ойылатын
Көзі түссе Феликстің
Темір торлы түрмелердің есігі.
Қос өкімет,
Екі тамыр,
Екі ұрық
ВЧКада алды қатар отырып.
Феликстің бірақ отты көзінен
Өртеніп-ақ кететін-ді өтірік.
Өтер уақыт
Миллион күн,
Мың апта.
Мәңгі қалар қыран үні құлақта.
Өлген соң да
Революция семсері —
Табытта емес —
Жатты қызыл қынапта!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу