Өлеңдер ✍️

  10.05.2021
  273


Автор: Ғафу Қайырбеков

Достық, туысқандықпен

Достық, туысқандықпен
Татулық, жомарт пейілді,
Қашаннан жүрек, жан күткен —
Махаббат, ықылас, мейірді.
Адамның асыл кездері
Осыларменен білінбек.
Шуақтай майда сөздері,
Жүздері тұрса күлімдеп.
Қиянат, қисық, қыңырлық
Мінезге түскен дерттерден
Арылып адам, жуынып,
Айнымай тұрса көктемнен.
Күншілдік, қулық, залымдық,
Арамтамақ, масылдық
Адамнан тартып алынып,
Ауаға кетсе шашылып.
Шіркін-ай, таза еңбекпен,
Өмірін тұрса көбейіп!
Осынау күнді қол жеткен
Рахат демей не дейік!
Жоспарда бүгін кездестім
Осынау жаңа адаммен,
Сол үшін деймін өлмеспін,
Сол үшін жырлар жазам мен!




Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу