Өлеңдер ✍️

Созылады екен тау Қоңыр
Сексен де тоқсан шақырым.
Бауырында бұлақ бар не бір
Ағатын шапшаң, ақырын.
Құт екен дерсің қойнауын
Қаймағы, сүті неткен көп!
Шалғыннан шыққан қойлардың
Омырауы көкпеңбек.
Асылар қойлар тауларға
Алқадай бейне тізіліп.
Тау басын шайқап қалғанда
Түсердей жерге үзіліп.
Ашылар сурет алдыңнан,
Қаз-қатар, оңнан, солдан да.
Арылмас мәңгі мал бұдан
Қоңыртау ғажап қорған ба?!
Жайлау да жайлау. мол жайлау,
Жаныңды жатқан шақырып,
Жарықтық жайсаң Қоныртау
Сексен де тоқсан шақырым...