Өлеңдер ✍️

Дария қашып, біз қуып поезбенен
Талай-талай бел асып, сол ізбенен
Жетіп келсек, алдымыз аппақ жазық
Осы екен ғой керемет - теңіз деген!
Теңіз, теңіз, телегей! Сен де анама
Ұқсап, жылы қарадың мен балаңа!
Бір қабаты аспанның жерге түсіп,
Шөгіп қалған секілді кең далаға!
Арал, Арал - жүректі бір батырсың,
Жалпақ құрлық - жасқанбай сен жатырсың.
Жоқ боп кетем демейсің - зор көмейден,
Шөл көмейден сақтаған қандай тылсым?
Бір бақытты бағалап жүз үміттен,
Қиырыңа кім екен жүзіп өткен?
Сонау жалғыз қайыққа шалғайдағы
Бұл жағадан қараймын қызығып мен.
Арал, Арал - қаһарман балықшылар,
«Су тәңірісі - ол» деген анық шығар.
Сулы мұртын сүйейін сол бауырдың
Айдыныңа мені тез алып шығар!