Өлеңдер ✍️

Соқ, қаттырақ барабанды,
Соқ, қаттырақ қыздыр қанды!
Әне, ашудан от тұтанды,
Намыс пен кек маздап жанды.
Өрт жүректер лапылдады
Басты қаптай алаңдарды.
Шықты көсем коммунистер –
Бастап батыл пролетарды,
Соқ, қаттырақ, барабанды!
Көсем жолдас айтты әділін:
− Шамырқанды Париж бүгін!
Кім кірлемек, ыластамақ
Француздың адалдығын?
Кім қорламақ, төмендетпек
Француздың адамдығын?
Кім зорламақ, бас идірмек
Француздың адал ұлын?
Париж - бүгін қаһарланды,
Қиюға әзір қан мен жанды.
Ұрлатпайды қолындағы
Француздар жейтін нанды,
Өлтіртпейді ойындағы
Коммуналар салған әнді.
Бас, жеделдет, бас қадамды!
Соқ, қаттырақ барабанды!
Жолдас көсем айтты шынын:
− Шешу керек Париж бүгін:
Я жұтады зымиян доллар
Француздың бостандығын;
Я француз салып жанын,
Керек болса төгіп қанын –
Күйретеді жау сұмдығын.
Париж, Париж, өрт тақалды!
Жау жанына қанжар салды!
Оқ атқан кім, өлтірген кім –
Өз бауырың - шахтерларды?
Білсін сенің құдіретіңді,
Жу тезірек қанмен қанды!
Баста батыл - пролетарды,
Соқ, қаттырақ барабанды!

1948