Өлеңдер ✍️

– Мыналар кімдер, қаптап бір келген осында,
Турасын айтшы, осының бәрі досым ба?
Қайсысын, қалай қадірлеп қарсы алайын,
Жауымды көрсең атап айт атын, жасырма.
– Тұрсың ғой көріп, көп адам келді осында,
Баршылық мұнда жауың да және досың да.
Досыңды көріп төгіле қалма, шашылма,
Қасыңды көріп қасара қалма, шошынба.
***
Түсінгенге, түпсіз бір тереңдеймін,
Түсінбеске тілсіз бір тереңдеймін.
Құсбегінің көзінде - сұңқардаймын,
Атсейістің көзінде - тұлпардаймын.
Танымастың көзінде түк те емеспін,
Ондайлардан «Әбекем» демейді ешкім.
***
Артқы аяғын шайнатқан арыстандай,
Мен де келем ыңыранып алыстардан.
Жаутаңдамай, жауыма тік қараймын
Дәрменім бар бүгінде алысқандай.
Жастан тапқан әдетім – өжеттігім
Қиын жерде қираймын қалыс қалмай.
***
Шығып ем ойнап жасымда талай дөңеске,
Жетіп-ақ қаппын асуын бермес белеске.
Жарамай қаппын жақсылар барар кеңеске
Осының өзі-ақ тозғаным менің емес пе?