Өлеңдер ✍️

Аспандағы алтын күн аймалаған,

Түпкі бабам туды екен қай анадан.

Сегіз қырлы, бір сырлы боп өсуді,

Үйренген бе асқар тау, сай-саладан

Шілік шауып, ши орып, қамыс жаққан,

Кім болды екен сол ана арыс тапқан.

Адалдықты жөргек қып туғанында,

Тал бесігін үкілеп намыс баққан.

Сол ғазиз жан баланы,- депті,- бақыт,

Содан бері қаншама өтті уақыт.

Сан мың жылдық мезгілдің өзенімен,

Сәлемдеме боп бізге жетті ағып.

Бабаларым туған жер - жұмақ мекен,

Бұлбұлыңдай өзіңді жырлап өтем.

Байлық, мансап көшпелі бұлтқа ұқсас,

Бақыт деген, шынында, ұрпақ екен.

Маңдайдағы жұлдызың, жұбанышың,

Аман болсын ұл-қызың, қуанышың.

Өмір-өзен тоқтамас, ағар мәңгі,

Бір толқыннан бір толқын туары шын...