Баталар ✍️

  22.03.2021
  531


Автор: Мұқағали Мақатаев

ҚАЗАҚТЫҢ РУЛАРЫНА БАТА

Қазақ болса ЖАЛАЙЫР болсын
Айналасы түгел ағайын болсын
Сол ағайын шуағы мен арайын көрсін!
Қазақ болса ҚАҢЛЫ болсын
Ханның алдында да арлы болсын
Айтқан сөзі нəрлі болсын
Мәртебесі мəңгі болсын!
Қазақ болса СІРГЕЛІ болсын
Бүкіл жұрты іргелі болсын!
Қазақ болса ЫСТЫ болсын
Алатаудай күшті болсын
Қонаевтай жүрегі түкті болсын!
Қазақ болса ЕКЕЙ болсын
Елдің борышын өтей берсін!
Қазақ болса ШАПЫРАШТЫ болсын
Алты құрлық пен қатынасты болсын!
Қазақ болса АЛБАН болсын
Алты АЛАШҚА арман болсын
Азаматтары жер тарпыған тарлан болсын
Рухы ХАН тəңірдей заңғар болсын!
Қазақ болса СУАН болсын
Шынға біткен шынар болсын
Сол биікке бүкіл қазақ құмар болсын!
Қазақ болса ДУЛАТ болсын
Айналасы жұмақ болсын
Балдары бір-бір жанған шырақ болсын!
Қазақ болса АРҒЫН болсын
Ақыл білімге алғыр болсын
Салған жолы даңғыл болсын!
Қазақ болса НАЙМАН болсын
Қанатын кеңге жайған болсын
Жарты əлемді жаулап жатқан
Наймандардай қайдан болсын!
Қазақ болса КЕРЕЙ болсын
Қолтығымыздан демей берсін
Шыңғыс ханды шырылдатқан
Тұғрыл хандай мерей болсын!
Қазақ болса ҚОҢЫРАТ болсын
Барған жері бір-бір шаңырақ болсын!
Қазақ болса УАҚ болсын
Айналасы шуақ болсын!
Қазақ болса ҚЫПШАҚ болсын
Мықтымын дегендер жағасынан ұстап көрсін!
Қазақ болса АЛШЫН болсын
Қолыңда күміс қамшың болсын!
Қазақ болса ƏЛІМ болсын
Алты алашқа мəлім болсын!
Қазақ болса ТАБЫН болсын
Жүрегі от жалын болсын!
Қазақ болса ТАМА болсын
Тамадай болу үшін шама болсын!
Қазақ болса БАЙҰЛЫ болсын
Бүкіл қазаққа қайыры болсын!
Қазақ болса ЖАҒАЛБАЙЛЫ болсын
Ойлағаны заман жайлы болсын!
Қазақ болса ШЕКТІ болсын
Қыздары қызжібектей текті болсын!
Қазақ болса БЕРІШ болсын
Жүрген жері өріс болсын
Барған жері жеңіс болсын!
Қазақ болса ЖАППАС болсын
Жаратқанның өзі соған жақтас болсын!
Қазақ болса АДАЙ болсын
БІРАҚ АДАЙЛАРДАН АБАЙ БОЛСЫН!
Төреге барсаң олжаң болсын!
ҚОЖАҒА барсаң қасыңда молдаң болсын!
ҚАЗАҚ болсын мейлі, аз ақ болсын
Ең бастысы БОЛАШАҚ пен АЗАТ болсын!!!

(АУМИН)



Әлеуметтік желілерде бөлісіңіз:
Facebook | VK | WhatsApp | Telegram | Twitter

Пікір жазу