Өлеңдер ✍️

Кең даланың заңына тек бағынған,

Елім, сенен,

Айналайын бағыңнан!

Киіз үйге ұқсайды екен

Ертеде

Баспаналар Архайымда салынған.

Дөп-дөңгелек жерге жылу берген күн,

Жүзі де сол- айдың, айдын көлдердің.

Төңкерілген аспан- қазақ қазаны,

Төрт бұрышты көкжиекті көрген кім?!

Ыдыс-аяқ: кесем, құман, табағым-

Көшірмесі жұмыр жердің,

Даланың.

Келбетіме жарасқан соң

Басыма

Дөп-дөңгелек бөрік киіп аламын.

Іске асырған ата-баба арманын,

Өзі тапқан дөңгелегі арбаның.

Шыр айналған дүниеге ұқсайды

Атқа мініп құйғытқанда жан-жағым.

Дөп-дөңгелек үй шайқалмас жел ессе,

Тік!

Ыңғайлы ой ма, қыр ма, белес пе?!

Қазағымның ойы биік,

Өйткені

Шаңырағы- заңғар аспан емес пе?!

                               Киіз үйде тал бесікке бөлендім,

Кең даламда бақытыма кенелдім.

Мүмкін емес,

Көкжиегі көңілінің

Кең болмауы көкжиегі кең елдің!