Өлеңдер ✍️

Қарақошқыл топырағы ауылдың,

Түсіп жатыр қабіріне бауырдың.

Бір-бір уыс топырағы қосылды

Оған мұнда жиналған бар қауымның.

Топырақ сап жас қабірге егілді ел,

Күнәсі егер болса енді жеңілдер.

Уыс-уыс жауып жатыр тілектер,

Үміт,

Сенім,

Қимас ыстық көңілдер.

Топырақта қасиеті даланың,

Нәрін берген

Нұрын сепкен оған Күн!

Әкең арман еткен кеше соғыста,

Бауырым-ай,

Торқаға сен орандың.

Айналарсың өзің де ертең торқаға

Ораларсың гүл боп өскен ортаға.

Өбектейді сонда  қайта Туған жер,

Күннің нұры,

Жылу, жауын – төрт Ана!