👈 қаріп өлшемі 👉

  Өлеңдер ✍️

  29.11.2022
  102


Автор: Сүндет Сейітов

Қаңтар жыры


Жыладым мен де, жыладың сен де сол күні,

Жаныңа батып, қаңтардың сонау қорлығы.

Айрық айында қабырғасы қарс айырылған,

Ертеңгі күні “жылайрық” дейді ел мұны.




Әлі де менің көңілімде титтей қылау бар,

Мазалай берді “Жаңа Қазақстан” дейтін ұрандар.

Ей, тірі құрбым, дұғаңды жаса сол күні,

Дәмете келген әруақтарың да бір аунар…




Көздерден ащы тұрғаныменен жас ағып,

Шаш ал дегеннің орнына олар бас алып,

Өкіріп жатып, шыңғырып жатып түрмеде,

Жаңа Қазақстанды жасадық!




Ержігіт сол күн құшақтап тұрып ғашығын,

Бойжеткен сол күн аялап тұрып асылын.

Кемпір-шал сонда қырылған елді көрді де,

“Астапыралла, обал-ай” деді жасырын.




Обалы кімге?

Осы еді бізге жетпеген,

Қаңтарды енді шілдеден бетер жек көрем.

“Айналайын” деп айтатын жұрт қой, жазған-ау,

…Айналма жолда айналып қана кеткен ел!


Кейінірек оқу үшін сақтап қойыңыз:



Пікір жазу


Біз cookie файлдарын пайдаланамыз!
Біздің сайтты пайдалануды жалғастыра отырып, сіз сайттың дұрыс жұмыс істеуін қамтамасыз ететін cookie файлдарын өңдеуге келісім бересіз. Cookie файл деген не?
Жақсы