Базар, сауда

Базар, сауда

Саудагер ажарын сатады,
Сұрамсақ назарын сатады.

Арзан болса,
Алушыдан ынсап кетеді.
Қымбат болса,
Сатушыдан ынсап кетеді.

Сауда сақал сипағанша.

Барымен базар,
Жоқты қайдан қазар.

Базарда мың кісі бар,
Әркім танығанына сәлем береді.

Аңшы қақпанды қаққанын айтар,
Саудагер базарда тапқанын айтар.

Молданы мазарда көр,
Делдалды базарда көр.

Жігіт көркі - сақал,
Базар көркі - бақал.

Ажарлы мал базарлы.

Алтын базарында бағалы.

Базарға бар да, бағыңды сына.

Базар - ақшалыға базар,
Ақшасызға назар.

Базар - бай, алушы - кедей.

Бардың базары жанында.

Базары жақын байымас.

Базардағы ас бағына қарай піседі.

Базарға әркім барар,
Өзіне керегін алар.

Базарда бәрі бар,
Ақшаң болса, әрі бар.

Алдамасаң, базар жоқ.

Құдығына қарай қауғасы,
Базарына қарай саудасы.

Үйдегі есепті базардағы сауда бұзады.

Арзан менен қымбаттың,
Базар берер нарқы бар.
Жақсы менен жаманның,
Адам берер парқы бар.

Малдың нарқын иесі емес, базар айтар.

Бай кісі базарға барса, сұм хабар алар.

Сау басын саудаға салды.

Сақалын саудаға салды.

Сауда садақпен тең,
Иілсе бір түзелмейді.

Бір сауда иіп кетеді,
Бір сауда киіп кетеді.

Сауда соңы - кемістік,
Шаруа соңы - келістік.

Алушы мал таныса,
Сатушыға не тұрыс.

Кеден кеден болды,
Кеден неден болды?


Жақсымен сауда қылсаң, керіс болмас,
Жаманмен сауда қылсаң, тегіс болмас.

Саудада достық жоқ,
Сәлемде борыштық жоқ.

Алдың - ұттың, саттың - жұттың.

Бай бауырын танымас,
Сауда досңа қарамас.

Аталастың саудасы айында қайтады.

Кілем сатсаң, ауылдасыңа сат,
Бір шетінде өзің отырасың.

Жортуыл түбі еш,
Сауда түбі - борыш.

Арзан алдайды.

Арзан сатқан жолдасынан көреді.

Пұлсыз берді, құнсыз алды.

Алданған алмай тұрып сенбейді.

Алушыдан қалмайды,
Айтушыдан қалады.

Ұн сатқанда желдетеді,
Тұз сатқанда селдетеді.

Әкім әділ болмаса, халық бұзылады,
Сауда әділ болмаса, нарық бұзылады.

Шаруа түбі - кеңес,
Сауда түбі - келіс.

Ұры қасын жейді,
Саудагер досын жейді.

Қолдағының құны жоқ.

Таразыдан жеген бақа болады.

Таразыдан жеген тоймайды.

Саудагерде дос болмас.

Саудагер - қасық, ел - теңіз.

Саудагер алдымен досын алдайды,
Өзгелерін сосын алдайды.

Саудагер құнықса,
Сақалын күзеп сатады.

Саудагер есепке байиды.

Саудагерде иман жоқ, арын сатады,
Өтірікшіде иман жоқ, жанын сатады.

Шаруа түбі - кеңес,
Саудагершілік түбі - егес.

Саудагер сақалды қолдан береді.

Ақысын берсе, боқысын шығарады.

Қалтасында тиын жоқ,
Түйенің тісін санайды.

Бір қолың бір қолыңды жуады.

Арзанның сорпасы татымас.


Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇



Пайдалы сілтемелер:
» Ораза кестесі 2024 жыл. Астана, Алматы, Шымкент т.б. ауыз бекіту және ауызашар уақыты
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу

Соңғы жаңалықтар:
» Биыл 1 сыныпқа өтініш қабылдау 1 сәуірде басталып, 2024 жылғы 31 тамызға дейін жалғасады.
» Жұмыссыз жастарға 1 миллион теңгеге дейінгі ҚАЙТЫМСЫЗ гранттар. Өтінім қабылдау басталды!
» 2024 жылы студенттердің стипендиясы қанша теңгеге өседі