Өлең: Жұмағали Саин (Май сипаттары)

Өлең: Жұмағали Саин (Май сипаттары)



Таңның сыры таң қалғандай,
Тарихта еш болмаған,
Күннің көзі от жанғандай,
Көріп көңілі тоймаған.
Елі күліп, құсы сайрап,
Күні күлім қаққандай.
Ағаштары тұр масайрап,
Бүгін шолпы таққандай.
Шолпылары көк жапырақ,
Ағашына берген сән,
Дәл басында құстар шулап,
Мәз болады шырқайды ән.
Қаз қаңқылдап, үйрек ұшып,
Сұлу аққу көлінде.
Табиғат бай түрге түсіп,
Ажар кірген жеріне.
Қыры көкшіл, ойы майса,
Қызыл, жасыл қызғалдақ.
Бал мінезді қалқатайша,
Бас .иеді бұлғаңдап.
Әне, қара, жер шебері,
Қара мақпал қиғандай,
Соқа салды Енбек Ері
Жер айырды, тұр қандай!
О да жерге өрнек салар,
Өрнек салар мәнерлеп,
Жыртқан жері алтындай,
Сонсын айтам шебер деп.
Еңбек жыртқан қара жерге,
Алтын бидай өнеді,
Мақпалдайын асқар белге,
Жарқын көрік береді.
Таңы сырлы таң қалғандай,
Тарихта еш болмаған,
Күні нұрлы от жанғандай,
Көріп көңіл тоймаған.


Комментарии для сайта Cackle