Жұмбақтар жауабымен: Техника, көлік, шеберхана құралдары

Күші білінбес жүзінен,
Қақ бөлінер әйнегің,
Сызып өткен ізінен.
Алмас

Ағаш көрсе қышынар,
Сояу-сояу тісі бар.
Ара

Маржан тісі ақсиып,
Ызылдап ән шырқады.
Көк тіреген қақшиып,
Қарағайды қырқады.
Ара

Қарасаң,
Жай зат сияқты күші кем,
Бірақ та,
Бүтінді қақ бөледі тісімен.
Ара

Екі тас беттескен,
Жұтады бидайды.
Бір дәнін Бірақта,
Жеуге өзі қимайды.
Майдалап қайтадан,
Адамға сыйлайды.
Диірмен

Орнатылған шығырға,
Қанаты бір талмайды.
Тұрғанымен тұғырда,
Жел соңынан қалмайды,
Айналады зырылдап,
Жанармайсыз бірақта.
Күні бойы шырылдап,
Ұша алмайды жыраққа.
Жел диірмен

Құс ұясы секілді,
Үйшігі бар биікте.
Өрілген қос кекілді,
Тұрар мойын иіп те.
Кран

Үш көзді батыр,
Жолды аңдып жатыр.
Бағдаршам

Бірнеше тармақты,
Лақтырсаң қармақты.
Жүздірмей тастайды,
Кемені салмақты.
Зәкір

Шымыр білек қайыспай,
Көтергенде ауыр жүк,
Тік тұрады майыспай.
Домкрат

Төбесінде кіндігі,
Жалғанған желіге.
Қабырғада күндігі,
Нұр шашқан төріне.
Троллейбус

Қатар жатқан қос білек,
Үстінен келер күш үдеп.
Теміржол

Жер асты даңғылы,
Көлігінің зулаған,
Естіледі саңқылы.
Метро

Әкемнің тор тайы,
Май жалап, су ішсе,
Тоқтамай жортады.
Машина

Жер қатпарын қашайды,
Тау да,
Сай да жасайды.
Қыршылдатып тістерін,
Топырақты асайды.
Экскаватор

Жылжымалы баспалдақ,
Сатыларын бассаң нақ,
Не жоғары, не төмен,
Сырғимын да жетем мен,
Көзді жұмып, ашқанша-ақ.
Эскалатор

Көктен көзін алмайды,
Ғарыш сырын барлайды.
Телескоп

Тоққа қоссаң зырылдайды,
Бір бағыттан бұрылмайды.
Жуан жұмыр темірді,
Қырнап, жонып кемірді,
Өлшеп берсең кеседі,
Керек етсең теседі,
Артық болса қашайды,
Қажет тетік жасайды.
Станок

Тақылдатып таңдайды,
Егінді тез жалмайды.
Дәнін берер тазалап,
Өзі түкте алмайды.
Комбайн

Құстан аумайды,
Көкте заулайды.
Ұшақ

Жоғарыдан айдадым,
Белін жіппен байладым.
Сыпыра тақта астында,
Шалып, қағып ойнадым.
Іс машинасы

Болғанда екі құлақ, екі шелек,
Бітіпті ортасында шынар терек.
Теректің сабынан ба деп ойлаймын,
Тұрады жауын жауып, күн себелеп.
Насос

Бір нәрсе жіппен байлап қойған мықты,
Адаммен қатынасы сондай күшті.
Саңқылдап керек затқа хабар берер,
Бір жерін аңдаусызда басса жетті.
Телефон

Бір нәрсе әуенменен сөйлеп қатты,
Әуеден оның өзі керек тапты.
Сөйлесе маңызды сөз әңгімесі,
Қаратады аузына жамағатты.
Радио

Бір нәрсе бар дүниеде тұмсығы ұзын,
Әп-сәтте аралайды жердің жүзін.
Санап көрсем көп адам таниды екен,
Таптырмайтын десе де басқан ізін.
Радио

Бір жәшік төртбұрышты сырғасы бар,
Көтерсең сырғасынан дауыс шығар.
Қанша алыс болсаңдағы екі сырға,
Естіліп бір-біріне жақын қылар.
Телефон

Бір жылан жердің жүзін орап жатқан,
Сұрасаң сөз айтады бір тараптан.
Ау, жаным, тапқын мұны көп ойламай,
Шығады деп айтып тұрмын көңіл шаттан.
Телеграф

Бір хайуан зырлап ұшады екі аяқ,
Көлденең тірегені айқыш таяқ.
Екі қол-аяғында дабыл болмас,
Жүреді тілін білсең шапшаң жай-ақ.
Велосипед

Бір құс бар өзі үлкен көп аяқты,
Қанаты, жүні әдемі салтанатты.
Адамды қиқу салып шақырады,
Қанатын су үстіне шылпылдатты.
Пароход

Бір зымырық дүниеде екі аяқ,
Күш берген оған дағы аямай-ақ.
Адамды көтеріп ол ұшады екен,
Былқылдап құс төсектен жұмсақ тұяқ.
Велосипед

Жақындаған нәрсенің,
Бірі өзгермей қалмаған,
Жегендері қайталап,
Ағып жатыр артынан,
Шыққандай-ақ қоймадан,
Кейін керек болар деп,
Асылын сақтап ойлаған.
Комбайн

Келетін ғажайып бар әр тараптан,
Екпіні бір кем емес, атқан оқтан.
Үстінде неше түрлі нәрсесі бар,
Бу шығып құлағынан бұрқыратқан,
Ысқырып, ыңыранса азан-қазан,
Қос көзін маңдайында жылтыратқан.
Поезд

Қалмайды бір-бірінен, тағы озбайды,
Аяғын көз ілеспес ол қозғайды.
Үстіне не салсаң да тиеп алып,
Қара інген ботасы жоқ құр боздайды.
Паровоз

Ауылдан ауылға асады,
Іргесін бірге қосады.
Жатыр ұзын көсіліп,
Белден әрмен жосылып.
Жол

Бір алып мыңды тартады,
Үстіне жүгін аямай артады
Поезд

Бас-аяғы теп-тегіс болып біткен,
Селкілдесе денесі дір-дір еткен.
Өзіне қандай жуан кез келсе де,
Күшімен қақ айырып бөліп кеткен.
Темір ара

Кішкене өзі, мың көзді.
Оймақ

Жаһанда бір құс көрдім жалғыз аяқ,
Аузына тістегені темір таяқ.
Бір ұрсаң шапалақпен семіреді,
Белбеуі бар белінде жалғыз қабат.
Ұршық

Әуелде шөп едім,
Жерде өскен көк едім.
Қолға түсіп қиылдым,
Он жерімнен буылдым.
Ши

Өз елімде жеке едім,
Желкілдеген бек едім.
Мұнда келіп сайландым,
Қырық жерден байландым.
Тоқылған ши

Мың-миллион пернелі
Домбыраны көрген кім?
Темір жол

Көк тіреген діңгек тұр,
Бар әлемнен сыр кеп тұр.
Телемұнара

Киіміңнің,
Бұйымыңның
Жатқызады тігісін,
Жатқызады қыртысын.
Үтік

Бір тетігін басқанда,
Алып шықты аспанға.
Басып тағы байқап ем,
Жерге түстім қайта мен.
Лифт

Саусақ тіреп біртіндеп,
Баса берсең сабазды,
Сөйлетеді бір тілде
Қабат-қабат қағазды.
Баспаханалық мәшине

Мың миллион пернелі
Домбыраны көрген кім?
Темір жол рельсі

Екі аяқты желаяқ,
Артсаң болды сен аяқ,
Жетем деген жеріңе
Жеткізеді оңай-ақ.
Велосипед

Екі жақты,
Екі сапты.
Барлық затты
Тістер қатты.
Қысқаш

Kөмip шайнап,
Teмip құсады.
Домна пеші

Жүзімен шабады,
Шүйдесімен соғады.
Балта

Әлеуметтік желілерде бөлісіңіз:
Facebook | VK | WhatsApp | Telegram | Twitter

Қарап көріңіз 👇

kz | Жұмбақтар жауабымен

12.10.2006

Автор: nurgul95
2 106

Пайдалы сілтемелер:
» Туған күнге 99 тілектер жинағы: өз сөзімен, қысқаша, қарапайым туған күнге тілек
» Абай Құнанбаев барлық өлеңдер жинағын жүктеу, оқу
» Дастархан батасы: дастарханға бата беру, ас қайыру

Соңғы жаңалықтар:
» Су тасқынынан зардап шеккендерге қосымша тағы 553 мың теңге төленеді
» Елімізде TikTok желісі бұғатталуы мүмкін бе?
» Елімізде су тасқынынан зардап шеккендердің қандай мүліктеріне өтемақы төленеді?